អ៉ីរ៉ង់៖ ជនជាតិអ៉ីរ៉ង់យ៉ាងហោចណាស់ ១០០នាក់ត្រូវបានចាប់ខ្លួនដោយសារបាតុកម្ម និងការតវ៉ាទូទាំងប្រទេសក្នុងអំឡុងពេល ១០០ថ្ងៃចុងក្រោយនេះ ដោយអ្នកដែលត្រូវចាប់ខ្លួនទាំងនោះអាចប្រឈមនឹងការដាក់ទោសប្រហារជីវិត។ នេះបើតាមការឱ្យដឹងពីក្រុមការពារសិទ្ធិមនុស្សក្នុងប្រទេសអ៉ីរ៉ង់ (IHR) បានបញ្ជាក់នៅថ្ងៃអង្គារម្សិលមិញ។ 

បាតុកម្ម​ និងការតវ៉ាបានផ្ទុះឡើងស្ទើររតែទូទាំងប្រទេសអ៉ីរ៉ង់ ចាប់ពីថ្ងៃទី១៦ ខែកញ្ញាមកម្ល៉េះ បន្ទាប់ពីមានការចាប់ និងឃុំខ្លួនលើស្រ្តីម្នាក់ឈ្មោះ Mahsa Amini វ័យ២២ឆ្នាំ រហូតដល់បាត់បង់ជីវិត ក្រោយពេលដែលនារីខាងលើត្រូវចាប់ខ្លួនដោយចោទប្រកាន់ពីការបំពានច្បាប់លើការស្លៀកសម្លៀកបំពាក់សម្រាប់ស្រ្តីដ៏តឹងតែងក្នុងប្រទេស។

កាលពីដើមខែធ្នូ ​អ៉ីរ៉ង់បានកាត់ទោសប្រហារជីវិតលើបុរសពីរនាក់ដែលមានជាប់ពាក់ព័ន្ធនឹងបាតុកម្មនេះដែលជាការកើនឡើងនៃការបង្រ្កាបរបស់អាជ្ញាធរ ដែលសកម្មជននិយាយថា មានគោលបំណងបំផុសការភ័យខ្លាចជាសាធារណៈ។ ក្នុងរបាយការណ៍កាលពីថ្ងៃអង្គាររបស់ក្រុមសិទ្ធិមនុស្ស (IHR) បញ្ជាក់ថា ក្នុងចំណោមអ្នកជាប់ឃុំឃាំងទាំងជាង ១០០នាក់នោះ អាចនឹងត្រូវកាត់ទោសប្រហារជីវិត ខណៈមនុស្ស ១១នាក់ត្រូវបានយទទួលទោសប្រហារជីវិតរួចទៅហើយ។ 

ក្នុងការតាមដានទិន្នន័យ ក្រុមសិទ្ធិមនុស្ស IHR បានឱ្យដឹងថា យ៉ាងហោចណាស់មានមនុស្សចំនួន ៤៧៦នាក់ទៅហើយបានស្លាប់ក្នុងអំឡុងការប៉ះទង្គិចដោយសារបាតុកម្មនេះ។ ដោយឡែក អាជ្ញាធរអ៉ីរ៉ង់វិញបានបញ្ជាក់ថា មានមនុស្សយ៉ាងហោចណាស់ ២០០នាក់បានស្លាប់អំឡុងការប៉ះទង្គិច ក្នុងនោះក៏មានកងកម្លាំងបង្ក្រាបរបស់អាជ្ញាធរផងដែរ។

គួរបញ្ជាក់ថា កាលពីថ្ងៃទី១២ ខែធ្នូ មានបុរសវ័យ ២៣ឆ្នាំម្នាក់ត្រូវបានប្រហារជីវិតដោយការព្យួរ-ក ក្រោយពីតុលាការកាត់ទោសប្រហារជីវិតដោយចោទប្រកាន់ពីបទឃាតកម្មទៅលើកងកម្លាំងពីរនាក់ដោយប្រើប្រាស់កាំបិត។ បួនថ្ងៃក្រោយមក មានបុរសម្នាក់ទៀតត្រូវបានប្រហារជីវិតដូចគ្នា ដោយចោទប្រកាន់ពីករណីធ្វើឱ្យកងកម្លាំងមានរបួស៕